សម្តេចពិជ័យសេនា ទៀ បាញ់ ៖ ការចំណាយស៊ីហ្គេម-អាស៊ានប៉ារ៉ាហ្គេម ក្នុងរង្វង់ ១១៨លានដុល្លារ

CAMSOC-ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានគណៈកម្មាធិការជាតិ CAMSOC-CAMAPGOC មានប្រសាសន៍ថា ព្រឹត្តិការណ៍ប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣នេះ គឺបានចំណាយថវិកា​ចំនួន ១១៨លានដុល្លារអាមេរិក ដែលជាថវិកាសន្សំរបស់​រាជរដ្ឋាភិបាលកម្ពុជា តាំងពីយូរមកហើយ។ នេះជាប្រសាសន៍សម្តេចពិជ័យសេនា នៅក្នុងសន្និសីទសារព័ត៌មាន កាល​ល្ងាចថ្ងៃទី២៨ ខែមេសា ឆ្នាំ២០២៣ នៅពហុកីឡដ្ឋានមរតកតេជោ។

សម្តេចពិជ័យសេនា ទៀ បាញ់ បានសង្កត់ធ្ងន់ថា ការចំណាយក្នុងរង្វង់ ១១៨លានដុល្លារនេះ គឺគិតទាំងពីការរៀបចំផ្នែកហេដ្ឋារចនាសម្ព័ន្ធគ្រប់បែបយ៉ាង តាំង​ពី៣ឆ្នាំមុនមកជាបន្តបន្ទាប់ ដោយសារការរៀបចំព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះ ឱ្យ​មាន​លក្ខណៈសុក្រឹត ស្របតាមស្តង់ដាអន្តរជាតិ ទៅតាមប្រភេទកីឡានីមួយៗ។​

«ថវិកានេះបូកបញ្ជូលទាំងការចំណាយផ្សេងៗ ដូចជាការជួលមជ្ឈមណ្ឌលពិព័រណ៌ជ្រោយចង្វារ OCIC ទាំងមូល សម្រាប់ការរៀបចំការប្រកួតកីឡាក្នុងសាលមួយចំនួន ព្រមទាំងការចំណាយលើផ្នែកកីឡាពីគណៈកម្មាធិការជាតិអូឡាំពិកកម្ពុជា និងផ្នែកកីឡាជនពិការ។ បូករួមទាំងការចំណាយផ្សេងៗទៀតជាច្រើន ដូចជាបានចូលរួមប្រកួតព្រឹត្តិការណ៍កីឡាអន្តរជាតិនានា នៅក្រៅប្រទេស ដូចជាថ្លៃសំបុត្រយន្តហោះ ថ្លៃហូបចុកស្នាក់នៅជាដើម។ យើងបានចំណាយថវិកាជាបន្តបន្ទាប់ចាប់ពីពេលនោះមកដល់ពេលនេះ»។ សម្តេចសេនាពិជ័យ បានបញ្ជាក់។

ប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន បានសម្រេចចិត្តផ្តល់ការហូបចុកស្នាក់ និងការដឹកជញ្ជូនសម្រាប់ប្រតិភូកីឡាទាំងអស់ក្នុងអាស៊ីអាគ្នេយ៍ ដែលមកប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ​២០២៣ ដោយឥតគិតថ្លៃ (៧លានដុល្លារបន្ថែម) ដែលសរុបទាំងអស់ពេលនេះ ១១៨លានដុល្លារអាមេរិក។

ដោយមានការលើកឡើងចំពោះការចំណាយក្នុងការរៀបចំស៊ីហ្គេម មុនៗពីបណ្តាប្រទេសជាម្ចាស់ផ្ទះ កន្លងមក គឺកម្ពុជាបានចំណាយតិចជាងគេ។ ត្រង់ចំណុចនេះ សម្តេចពិជ័យសេនា ទៀ បាញ់ បានសង្កត់ធ្ងន់ថា ៖ «យើងបានគិតគូយ៉ាងហ្មត់ចត់ណាស់ ដោយកម្ពុជាធ្លាប់ក្រលំបាក ដូច្នេះការចំណាយថវិកាជាតិក្នុងចំនួននេះ គឺជាការសន្សំសំចៃ ប៉ុន្តែយើងរួបរួមគ្នាគ្រប់ផ្នែកទាំងអស់ធ្វើកិច្ចការដោយស្មារតីទទួលខុសត្រូវខ្ពស់ ដើម្បីជំរុញឱ្យ​ព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជាមានភាពអស្ចារ្យ»៕