ព្រឹត្តិការណ៍រត់ប្រណាំង AIA Pink Run គឺជាការចូលរួមលើកកម្ពស់និងការយល់ដឹងដល់ស្ត្រី ដែលមានជំងឺមហារីកសុដន់

Sep 05, 2023

NEWS

ថ្លែងនៅក្នុងពិធីចុះMOU រវាងក្រុមហ៊ុនធនារ៉ាប់រង AIA និង គណៈកម្មការម៉ារ៉ាតុង កាលពីព្រឹកថ្ងៃទី ០៥ ខែកញ្ញា ម្សិលមិញនេះ ឯកឧត្តមវ៉ាត់ ចំរើន អគ្កលេខាធិការនៃគណៈកម្មាធិការជាតិអូឡាំពិកកម្ពុជា បានលើកឡើងបែបនេះថា៖ ការរត់ប្រណាំង AIA Pink Run នេះ ក៏ដើម្បីចូលរួមលើកកម្ពស់ការយកចិត្តទុកដាក់ និងការយល់ដឹងដល់ស្ត្រី ដែលមានជំងឺមហារីកសុដន់ផងដែរ ហេតុនេះគណៈកម្មការរៀបចំ នឹងសហការជាមួយក្រុមគ្រូពេទ្យជំនាញ ដើម្បីរៀបចំជាកន្លែងពិនិត្យរកមើលជំងឺមហារីកជូនដល់ស្រ្តីគ្រប់រូប ដោយមិនគិតថ្លៃចំនួន៣ថ្ងៃ គឺថ្ងៃទី២០ ដល់ទី២២ ខែតុលា ឆ្នាំ២០២៣ នៅទីតាំងប្រកួតផ្ទាល់តែម្តង។

ឯកឧត្តមបន្តថា៖ «យើងផ្តោតការយកចិត្តទុកដាក់ជួយដល់ស្រ្តី ព្រោះការចូលរួមរបស់ស្រ្តី ជាគោលការណ៍ រួមរបស់ចលនាអូឡាំពិកអន្តរជាតិ ហើយនៅក្នុងនោះ AIA បានមើលឃើញនៅចំណុចខ្លាំងមួយទៀត គឺការជួយដល់ស្រ្តី ដែលមានជំងឺមហារីកសុដន់ ព្រោះស្ត្រីយើងភាគច្រើន មានបញ្ហាជំងឺនេះ តែអ្នកខ្លះមិនបានដឹងថា គាត់កើតជំងឺនេះទេ អ៊ីចឹងយើងនឹងរៀបចំកន្លែងពិនិត្យរកជំងឺមហារីកនេះជូនដល់ស្រ្តីគ្រប់រូប ដោយមិនគិតថ្លៃ និងប្រកបដោយប្រសិទ្ធភាពខ្ពស់»។

លើសពីនេះ ការរៀបចំព្រឹត្តិការណ៍រត់ប្រណាំង AIA Pink Run ក៏ផ្តោតសំខាន់ទៅលើការប្រមូលប្រាក់កម្រៃ ដើម្បីជួយដល់ការងារសប្បុរសធម៌ ព្រមទាំងជួយដល់កីឡាករ កីឡាការិនី ដែលមានបញ្ហារបួស និងព្រឹទ្ធាចារ្យកីឡា ឬអ្នកកីឡាចាស់ៗ ដែលមានជំងឺឈឺថ្កាត់ផងដែរ ដោយសកម្មភាពនេះ NOCC តែងបានធ្វើជាប្រចាំ តាមរយៈការរៀបចំព្រឹត្តិការណ៍កីឡាជាច្រើនឆ្នាំមកនេះ។

ឯកឧត្តមបញ្ជាក់ថា៖ «យើងមិនមែនធ្វើតែកីឡាទេ ប៉ុន្តែយើងមានគោលដៅផ្សេងទៀត ក្នុងការជួយដល់សង្គម និងស្រ្តីរបស់យើងថែមទៀត ហើយនៅរាល់ព្រឹត្តិការណ៍ទេសចរណ៍ ឬកីឡាមហាជន និងកីឡាកម្សាន្តទាំងអស់ គឺយើងយកផលកម្រៃបានពីការរៀបចំហ្នឹង ទៅជួយដល់ការងារសប្បុរសធម៌ អ៊ីចឹងទោះបានតិច ឬច្រើន យើងរៀបចំជួយទៅមន្ទីរពេទ្យ និងដាក់ចូលទៅក្នុងមូលនិធិសម្រាប់ជួយដល់អ្នកកីឡា ដែលនេះជាអំពើសប្បុរសធម៌ នៅក្នុងចលនាកីឡារបស់យើង ដើម្បីជួយដល់សង្គមជាតិ»៕