បំប៉នវិន័យ ក្រមសីលធម៌ ដល់ក្រុមជម្រើសជាតិកម្ពុជា សម្រាប់ស៊ីហ្គេម ឆ្នាំ​២០២៣

CAMSOC-ភ្នំពេញ៖ ក្រសួងអប់រំ យុវជន និងកីឡា បានរៀបចំសិក្ខាសាលា២ថ្ងៃ ពីថ្ងៃទី២៤-២៥ ខែមេសា ឆ្នាំ២០២៣ នៅមជ្ឈមណ្ឌលជាតិហ្វឹកហ្វឺនកីឡា ដើម្បីពង្រឹងបន្ថែមនូវ​វិន័យ ក្រមសីលធម៌​ដល់ក្រុមប្រតិភូ គ្រូបង្វឹក គ្រូជំនួយនៃក្រុមជម្រើសជាតិ សម្រាប់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលនឹងចូលមកដល់ឆាប់ៗខាងមុខនេះ។

ឯកឧត្តម ប៊ូ ជុំសេរី អនុរដ្ឋលេខាធិការ ក្រសួងអប់រំ យុវជន និងកីឡា បានជំរុញឱ្យ​សិក្ខាកាម ដែល​ជា​គ្រូបង្វឹក គ្រូជំនួយជម្រើសជាតិកម្ពុជាលើគ្រប់ប្រភេទកីឡាទាំងអស់ រក្សាឱ្យ​បាននូវវិន័យ ក្រមសីលធម៌​វិជ្ជាជីវៈឱ្យ​បានខ្ជាប់ខ្ជួន ក្នុងនាមជាម្ចាស់ផ្ទះស៊ីហ្គេម ជាប្រវត្តិសាស្ត្រដំបូង។

ក្នុង​នាម​តំណាង​ដ៏​ខ្ពង់ខ្ពស់​ឱ្យ​ឯកឧត្តម ស សុខា រដ្ឋលេខាធិការ ក្រសួងអប់រំ យុវជន និងកីឡា ទទួលបន្ទុកកីឡា ឯកឧត្តម ប៊ូ ជុំសេរី បាន​កោតសរសើរ និងវាយតម្លៃខ្ពស់ ចំពោះមន្ត្រី គ្រូបង្វឹក​គ្រប់​ប្រភេទ​កីឡា​ទាំងអស់ ដែលបានចូលរួម ក្នុងសិក្ខាសាលាដ៏មានសារៈសំខាន់នេះ ក្នុង​ការ​ចែក​រំលែក​បន្ត​ទៅ​ដល់​ក្រុម​កីឡាករ កីឡាការិនីជម្រើសជាតិរបស់ខ្លួន ត្រៀមប្រកួតប្រជែងមេដាយជូនជាតិ ក្នុង​នាម​ជា​ម្ចាស់​ផ្ទះ​ព្រឹត្តិការណ៍​កីឡាជាប្រវត្តិសាស្ត្រ នៅកម្ពុជា ឆ្នាំ២០២៣នេះ។

«ភារកិច្ចរបស់លោកគ្រូ អ្នកគ្រូ ក្នុងពេលនេះ គឺ​មាន​ការ​លំបាក​ហើយ ហើយ​បាន​ឆ្លៀត​មក​ចូលរួម​ស្តាប់របាយការណ៍ ការពន្យល់ក្នុងវគ្គសិក្ខាសាលានេះទៀត ប៉ុន្តែ​ទាំងអស់​នេះ គឺ​ជា​កាតព្វកិច្ច​ដែល​យើង​ទាំង​អស់គ្នា​ត្រូវតែ​ខិតខំយកចិត្តទុកដាក់ឱ្យ​បានខ្ពស់ និង​ប្រឹង​ប្រែង​ជំរុញឱ្យ​ព្រឹត្តិការណ៍​កីឡា​ស៊ីហ្គេម​ទទួល​បាន​ជោគជ័យ​ក៏ដូចជាអនុវត្តឱ្យ​បានល្អប្រសើរ នូវបេសកកម្ម ដែលរដ្ឋបានប្រគល់ជូន សម្រាប់ស៊ីហ្គេម ជាប្រវត្តិ​សាស្ត្រ​ដំបូង​របស់​កម្ពុជា នាឆ្នាំ២០២៣នេះ»។ ឯកឧត្តម ប៊ូ ជុំសេរី បានបន្ថែម។

ជាមួយគ្នានេះ​លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានបញ្ជាក់ជូនថា គោលបំណង​នៃការបើកវគ្គបំប៉ននេះ គឺដើម្បីឱ្យ​គ្រូបង្វឹក គ្រូជំនួយ និងកីឡាករ កីឡាការិនី​យល់ដឹងអំពីបេសកកម្ម និងស្គាល់តួនាទី ភារៈកិច្ចរបស់ខ្លួន ប្រកាន់ខ្ជាប់នូវវិន័យ ក្រមសីលធម៌ សេចក្តីថ្លៃថ្នូរ ប្រកបដោយកិត្តិយសមោទនភាពជាតិ ក្នុងការចូលរួមប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ គ្រូឧទ្ទេស​ជាច្រើនរូប នឹង​ចែករំលែក​នូវ​ខ្លឹមសារ​គន្លឹះ​ជុំវិញ​ការ​ត្រៀម​លក្ខណៈ​ចូលរួមប្រកួតកីឡាស៊ីហ្គេម អំពីវិន័យ និងក្រមសីលធម៌ ក្នុងការប្រកួត ដូចជាការស្នាក់នៅ និងការហូបចុក​ ការប្រឆាំងការប្រើប្រាស់សារធាតុហាមឃាត់ក្នុងកីឡា (ដូប៉ា) ការ​លេង​ដោយ​យុត្តិធម៌​ជាដើម។

បន្ថែមពីលើនេះ លោក ប៉ុន សុខ បានគូសបញ្ជាក់ថា នាយបេសកកម្ម (Chef the Mission) មានតួនាទីសំខាន់ណាស់ សម្រាប់ការដឹកនាំ គ្រប់គ្រងការធ្វើដំណើររបស់ប្រតិភូ គឺទំនាក់ទំនងផ្លូវការរវាង គណៈកម្មការរៀបចំការប្រកួត និងក្រុមកីឡា ដោះស្រាយបញ្ហារាល់សំណូមពររបស់កីឡាករ គ្រូបង្វឹក និង​មន្ត្រី​​កីឡាទាំងអស់ និងការប្រឆាំងការប្រើប្រាស់សារធាតុដូប៉ា ក្នុងវិស័យកីឡា គឺការបន្លំ ឬដូច​ស្លាប់​នៃសរីរាង្គ បញ្ញា ស្មារតី ដោយការបន្លំ បំភ័ន្តសមត្ថភាពអ្នកដទៃ និងដោយការទទួល​ស្គាល់អសមត្ថភាព​ខ្លួនឯង។

លោក ប៉ុន សុខ បាន​ឱ្យ​ដឹង​ទៀត​ថា សិក្ខាកាមត្រូវយល់ដឹងពីការប្រឆាំងនឹងឱសថហាមឃាត់ ដូច​ជាថ្នាំ​លើក​កម្លាំង ថ្នាំញៀន ថ្នាំជំនួយសរីរាង្គ ថ្នាំបញ្ចុះទឹកនោម ហ័រម៉ូន ប៉ិបនីដ និងគ្លីកូប្រូតេអ៊ីន...។ល។ ដូច្នេះលោក បាន​សំណូម​ពរដល់សិក្ខាកាមទាំងអស់មេត្តាយកចិត្តទុកដាក់ស្តាប់គ្រូទ្ទេសនាមនូវបទពិសោធន៍ និង​ចំណេះដឹងថ្មីៗបន្ថែមទៀត សម្រាប់យកទៅអនុវត្តក្នុងការចូលរួមប្រកួតកីឡាស៊ីហ្គេម លើកទី៣២ ជា​ប្រវត្តិសាស្ត្រ​ដែល​កម្ពុជា​ធ្វើជាម្ចាស់ផ្ទះ នាពេលខាង​មុខនេះ​ឱ្យ​ទទួល​បាន​ជោគជ័យ​ជូនជាតិ​មាតុ​ភូមិ​ជាប្រវត្តិ​សាស្ត្រ ក្នុងឆ្នាំ២០២៣នេះ៕